Serikali yatakiwa kununua helikopta kuzima moto.

Serikali imeshauriwa kununua helikopta (Chopa) katika kila mkoa kwa ajili ya kufanya shughuli za zimamoto badala ya kutumia magari ambayo hayafiki kwa wakati katika maeneo ya matukio kutokana na msongamano wa magari barabarani.

Ushauri huo ulitolewa jana bungeni na Mbunge wa Mji Mkongwe (CUF), Muhammad Ibrahim Sanya, alipokuwa akiuliza swali la nyongeza.

Katika swali lake, mbunge huyo alihoji kwanini serikali isiwe na utaratibu wa kununua Chopa kwa ajili ya kuwezesha vikosi vya zimamoto kutokana na miundombinu ya sasa kuwa mibaya ambayo pia inasababisha magari ya zimamoto kutofika katika maeneo ya matukio kwa wakati.

 “Tumekuwa tukishuhudia mara kadhaa moto unapotokea magari ya zimamoto yanashindwa kufika kwa wakati na hiyo ni kutokana na miundombinu kuwa mibovu. Ni kwanini serikali isione umuhimu wa kununua Chopa ili zitumike kuzima moto kuokoa maisha na mali za watu?,” alihoji.

Akijibu, Naibu Waziri wa Mambo ya Ndani ya Nchi, Pereira Ame Silima, alisema wanakubaliana na ushauri huo na kwamba fedha zitakapopatikana watanunua Chopa hizo na kuziweka katika miji mikubwa.

Awali katika swali la msingi, Mbunge wa Viti Maalum, Fakharia Shomari Khamis (CCM), alisema wananchi wengi hawajui kuwa Kikosi cha Zimamoto ndicho chenye wajibu wa kuzima moto na badala ya yake hukimbilia polisi hivyo kukosa msaada wa haraka kuzima moto.

Aliitaka serikali kutoa elimu kwa wananchi ili matukio ya moto yanapotokea watoe taarifa haraka kwenye vikosi hivyo.

Akijibu, Silima alisema Kikosi cha Zimamoto na Uokoaji ndicho chenye wajibu na dhamana ya kupewa taarifa za ajali na majanga.

Alisema katika kuhakikisha wananchi wanafahamu juu ya utoaji wa taarifa za ajali na majanga, kikosi hicho kinaendelea kutoa elimu kwa wananchi kupitia vyombo mbalimbali vya habari.

CHANZO: NIPASHE