Katiba Inayopendekezwa haiwezi kuleta mabadiliko kwa Watanzania

Rasimu iliyopitishwa na Bunge Maalumu la Katiba mjini Dodoma, ni kielelezo cha wazi cha ukweli huu kwamba ujinga ni mtaji mkubwa wa kisiasa unaotumiwa na chama tawala kwa wananchi wasiojitambua.

Hawa ni wananchi wanaoshabikia kibubusa kila kitu kinachopendekezwa na uongozi wa CCM, hata kama ni kwa masilahi binafsi ya viongozi wachache.

Wataalamu wa elimu wanasema kwamba ‘maarifa ni nguvu’ Mtu ukiwa na elimu na maarifa ya kujitambua na kutambua haki zako na nini inaendelea katika maisha yako, mazingira na nchi yako basi wewe umekombolewa.

Hata hivyo, kuendelea kuishi katika lindi la ujinga na giza la kutojitambua, ni mtaji wa kudanganganywa na kutawaliwa.

Bunge la Katiba mpya liliendeshwa kwa msingi ya udanganyifu, ubabe na kuukwepa ukweli uliopendekezwa na wananchi katika Tume ya Warioba. Daima tunasema kwamba uongo hauwezi kuzaa ukweli hata siku moja.

Ona pia suala la watangazania wa CCM, wote wanaongea lugha nzuri na kuonyesha kutetea masilahi ya wananchi, lakini walikuwa wapi na wamefanya nini katika kipindi chote hicho?

Wananchi waliojitambua wanauliza, kwa jinsi nchi ilipofikia chini ya chama tawala, kuna haja gani ya kuendelea kuichagua tena CCM inayoonyesha wazi kushindwa kuongoza nchi?

Watanzania wameahidiwa usawa wa 50/50 na katiba mpya. Hili linawezekana katika nchi kama ya Tanzania, wakati Ulaya na Marekani kwenyewe bado wanawake wanalalamika? Kuipitisha katiba hii ni sawa na “kuchukua kisu na kijichinja sisi wenyewe, au kuchukua bunduki na kujipiga risasi mguuni.

Tunahitaji katiba itakayoleta mabadliko katika nchi yetu na katiba hii pendekezwa, haina uwezo wa kubadilisha lolote. Hili ni suala la mfumo. Kila atakayekuja kuwa Rais kutoka CCM lazima alinde na kuendeleza mfumo huu wa unaowalinda wachache.

Katiba ya CCM

Rasimu ya CCM iliyopitishwa Bunge la Katiba kwa ujasiri mkubwa imeondoa uwazi na uwajibikaji kwa viongozi wake. Katiba pendekezwa inataka kuendeleza usiri na viongozi kujifanyia mambo kiholela holela kama wanavyotaka wao kwa manufaa yao, familia zao na marafiki zao.

Katiba hii ikipita wananchi hamtakuwa na uwezo wa kuwawajibisha viongozi wenu kama yalivyopendekeza maoni ya Rasimu ya Mzee Warioba.

 

CCM inakataa elimu kubwa kwa wabunge na badala yake inasema mtu akijua kusoma na kuandika basi inatosha, Hili ni balaa. Je, huku siyo kutumia mtaji wa ujinga ili kuwatawala wananchi?

Kinachoonekana katika nchi yetu ni kwamba Watanzania wanatawaliwa na watu wasio na elimu ya kutosha, mbunge wa darasa la saba anakwenda kumtungia sheria wakati nchi ina wasomi kibao wanazurura tu mitaani.

Je, mbunge mbumbumbu atasomaje mikataba na kuweza kuichanganua? Pia, mikataba yenyewe ni ya siri, maana yake ni kuendeleza ufisadi mkubwa wa rasilimali ya wananchi.

Mjue kwamba kupitisha katiba hii kuna madhara makubwa kwa uchumi wa Tanzania; ndiyo kusema pamoja na kuwa na rasilimali za gesi, madini, mbuga za wanyama pori umaskini utaendelea kuwaandama wananchi na Taifa kwa jumla.

Katiba inaendelea kuwadanganya wanawake eti watamiliki ardhi, uwezo huo wataupata wapi? Pia ardhi ya kumiliki ipo wapi jamani kwa maana ardhi kubwa wameshapewa wawekezaji wa kutoka nchi za nje

Aidha, wanaomiliki ardhi hiyo wengi ni viongozi na vigogo wa Serikali, je, wanawake mtamiliki nini sasa? Hizi ni siasa za kutaka kupata kura kutoka kwa watu masikini na wasiojitambua.

Kwa vile wanawake ndiyo mtaji mkubwa wa kura za CCM, basi wanajaribu kuwachota kwa kuwadanganya kuhusu ardhi kama walivyowachota Waislamu na suala la mahakama ya kadhi ambalo ni ndoto kuingia katika katiba, kwa sababu kila dhehebu lipo macho na suala la dini moja kupewa mamlaka ya kikatiba.

Kiukweli rasimu hii imeweka mzigo mkubwa wa baraza la mawaziri tofauti na rasimu ya Warioba ambayo ina maoni ya wananchi wenyewe.

Pia rasimu hii imependekeza Rais na makamu wa rais watatu, je, kule kukataa serikali tatu kwamba ni gharama kumbe hawakuwa na hoja kabisa. Wananchi tafakarini jinsi mtakavyokamuliwa fedha kuiwezesha Serikali hii kubwa badala ya kupunguza gharama.

Katiba hii itakuwa mbaya kuliko ya sasa ndiyo kwa maana Maaskofu wa Jukwaa la Wakristo wameikataa kama shetani na mambo yake.

Sasa ni wazi kwamba Serikali ya CCM haina nia thabiti ya kumkomboa mwananchi masikini kiuchumi, kisiasa, kiutamaduni wala kifikra. Serikali haina utashi huo inachotaka ni kuendeleza ulevi wa madaraka.

Ni kwa sababu hii hata watiania wa kiti cha urais kupitia CCM wote wameogopa kuongelea suala la Katiba Inayopendekezwa pamoja na Mahakama ya Kadhi.

Watanzania tutafakari, tufikiri na tuchukue hatua kwani nchi inaendelea kuliwa na wahenga husema “wajinga ndiyo waliwao.” Katiba Inayopendekezwa imejaa ubabe, fitina, vitisho, utumwa, umasikini,ubaguzi, mgawanyika katika jamii na ahadi hewa haina uwezo wa kuleta mabadiliko yanayokusudiwa na Watanzania wa leo.

Kinachotakiwa ni kwa umoja wetu bila kujali dini, itikadi wala kabila kusema kwa pamoja katiba inayopendekezwa “Hapana” katika kura ya maoni siku zijazo.

Ndiyo maana nawakumbusha Watanzania wenzangu kwamba Katiba Inayopendekezwa haiwezi kuleta mabadiliko yeyote yale katika nchi yetu pamoja na ahadi nyingi za watangazania wa CCM. Mungu utusaidie!