MBUNGE WA GEITA, DONALD MAX KUZIKWA JUMAMOSI

Kikao cha Bunge kimeahirishwa hadi leo ili kutoa fursa kwa wabunge kuomboleza kifo cha mwenzao aliyekuwa Mbunge wa Geita (CCM), Donald Max, kilichotokea juzi katika Hospitali ya Taifa Muhimbili (MHN) Dar es Salaam alikolazwa kwa matibabu baada ya kuugua kwa muda mrefu.

  Spika wa Bunge, Anne Makinda, alisema taarifa za awali zinaeleza kuwa mwili wa Max unatarajiwa kuzikwa Jumamosi, Dar es Salaam.

“Waheshimiwa wabunge nasikitika kuwatangazia kwamba ndugu yetu, Donald Kelvin Max, ametangulia mbele ya haki, alikuwa amelazwa kwa muda mrefu, lakini jana (juzi) mchana alituacha...utaratibu wa wale watakaotakiwa kwenda kuzika Katibu wa Bunge anafanya utaratibu, kwa mujibu wa kanuni zetu siku mwenzetu akifariki hakutakuwa na bunge,” alisema Makinda. Mbunge wa Busanda ( CCM), Lolesia Bukwimba, alimuelezea Max kuwa wakati wa uhai wake alikuwa ni mwenye  bidii na alifanya mambo makubwa kwa Mkoa wa Geita ambako alijenga uzio katika Hospitali ya Wilaya ya Geita, Shule ya Sekondari ya Geita mjini, na kwamba wananchi walikuwa wakimuamini katika jitihada zake hizo.

“Alijitoa kwa fedha zake,  alisadia wagonjwa katika hospitali ya Geita, wananchi wananzungumzia na kumkumbuka kwa kipindi chote tangu mwaka 2013 aanze kuugua. Wanakumbuka fadhila na kazi ambazo amezifanya katika wilaya ya Geita na kazi nyingi alifanya kabla hajawa mbunge,” alisema.

Mbunge wa Viti Maalum (CCM), Fatuma Mikidadi, alisema Max  alikuwa rafiki wa vyama vyote,  hodari, mwaminifu na mchapakazi.

Alisema mambo aliyoyasimamia ni watoto, uzazi wa mpango, uzazi salama ambayo, yaliingizwa katika bajeti, hivyo kuyasaidia makundi hayo.

Naibu Waziri wa Afya na Ustawi wa Jamii, Steven Kebwe, alimueleza kuwa alikuwa mchangiaji mzuri na imara katika kujenga hoja na kuzisimamia.

Kebwe alisema ni masikitiko makubwa kwa kipindi kifupi kupoteza wabunge watatu wa bunge hilo.

“Ni pigo kwa nchi yetu hususani Bunge kwa muda mfupi kupoteza watu muhimu watatu, ikiwa ni katika hatua za mwisho tukielekea kwenye uchaguzi mkuu  na ni simanzi kubwa,” alisema.

Mbunge wa Gando (CUF), Khalifa Suleiman Khalifa, alisema Max alikuwa ni mtu mwenye kutoa ushirikiano na kwamba maradhi yalimfanya kukaa nje ya nchi kwa muda mrefu hadi aliporudishwa nchini.

“Tumepoteza mtu ambaye alikuwa mpole, mwenye ushirikino, alipenda maendeleo ya wananchi wake, mara kadhaa alitoa hoja za wananchi wake, keleke zake zimesaidia mambo mbalimbali katika jimbo hilo,” alisema.

 Tangu Januari, mwaka huu, wabunge watatu wa CCM wamefariki dunia. Wengine ni aliyekuwa Mbunge wa Mbinga Magharibi, Kapteni John Komba na wa Ukonga, Eugine Mwaiposa.

CHANZO: NIPASHE