Msafara mpya waelekea Ghaza kuvunja mzingiro

Msafara mpya wa meli zilizowabeba wanaharakati wanaowaunga mkono wananchi madhulumu wa Palestina umeelekea katika eneo la Ukanda wa Ghaza katika juhudi za kuvunja mzingiro wa kidhulma uliowekwa na Israel dhidi ya wakaazi wa Kipalestina wa eneo hilo. 

Moja ya meli zijulikanazo kwa jina la Marianne of Gothenburg tayari imeondoka katika mji wa Palermo nchini Italia. Msafara huo wa wanaharakati uliaanza safari yao kuelekea Ghaza wakitokea Sweden mwishoni mwa mwezi Mei mwaka huu.

Msafara huo unaoelekea Ukanda wa Ghaza unatazamia kujiunga na meli nyingine ambazo ziko njiani kuelekea Ukanda wa Ghaza. Meli hizo ambazo zimebeba idadi ndogo ya suhula za kitiba na misaada mingineyo zinatarajia kuwasili Ukanda wa Ghaza mwishoni wa mwezi huu.

Meli kwa jina la Marianne of Gothenburg imebeba wanaharakati kutoka Sweden, Canada, Norway pamoja na bi Ana Maria Miranda Paza mwakilishi katika bunge la Ulaya kutoka Uhispania. Naye mbunge wa Israel mwenye asili ya Kiarabu Basel Ghattas amesema kuwa atajiunga na wanaharakati hao.